Donostia

Zer ikusi Donostian

XIX. mendearen amaieran Maria Cristina erreginak udako bizilekua Donostiako Miramar Jauregian jartzea erabaki zuenetik, hiria Euskal Herriko helmuga turistiko handiena izan da. Hondartzek, gastronomiak eta Kontxako badiaren edertasunak erakarrita, milaka bisitari hurbiltzen dira urtero Gipuzkoako hiriburura.

Paseo bat itsasertzean zehar eta pintxo batzuk jatea

Igeldo eta Urgull mendiak ezinbesteko bi leku dira Donostian bisitatzeko. Horietako bakoitza Kontxako badiaren mutur batean dago, eta talaia ezin hobeak dira badia, Santa Klara uhartea, Kontxako hondartza, edo Udaletxea ikusteko.

Urgull mendiaren magalean arrantza-portua eta Alde Zaharra daude. Hau taberna eta jatetxez beteta dago, haien pintxo gozoengatik ezagunak. Atsedenaldi bat hartu ondoren, Pasealeku Berrira joan gaitezke, mendia kostaldetik inguratu eta Urumea ibaiaren bokaleraino iritsiz. Hementxe daude Kursaal Kongresu Jauregia eta Zurriola hondartza.

Badiaren kontrako aldean, Igeldo mendiaren magalean, Haizearen Orrazia bisita dezakegu. Eduardo Chillidaren eta Luis Peña Gancheguiren lana hainbat haitzetan txertatutako altzairuzko hiru eskulturaz osatutako multzoa da, eta, batez ere olatuek kostaldean gogor hausten duten egunetan, itsasoaren ikuspegi hunkigarria eskaintzen digute.

Zinema, musika eta kultura

Donostiako Nazioarteko Zinemaldiak 70 edizio baino gehiago daramatza, eta munduko zinemaldi handienetako bat da. Zinemazaleak urtero hurbiltzen dira Maria Cristina hoteleko alfonbra gorria zeharkatzen duten nazioarteko izar eta zuzendari ospetsuak ikustera.

Musika klasikoari eskainitako Musika Hamabostaldia, Jazzaldia (Nazioarteko Jazzaldia), Fantasiazko eta Beldurrezko Zinemaren Astea edo Surfilm Festival dira urtero egiten diren kultur ekitaldietako batzuk, eta horiei esker izendatu zuten 2016an Donostia Europako Kultur Hiriburu.